ইন্দিয়াগী পুৱারিদা খ্বাইদগী হেন্না শেঞ্জা-থুমজা চত্থবদা নম্বর অহানবদা লৈরিবা বি জে পিনা লুচিংবা সেন্টরগী এন দি এ লৈঙাক অসীনা ইনভেষ্টিগেসন চত্থদনা মীওই কয়া জেলদা নমশীন্দুনা থমজিল্লি হায়না পিপলস দেমোক্রেতিক পার্টি (পি দি পি) গী চিফ মেহবুবা মুফটিনা অকনবা মওংদা য়ানীংদবা ফোঙদোক্লদুনা বি জে পিবু চৈখ্রে।
আর্বিন্দ কেজ্রিৱাল, ঝরখন্দগী চিফ মিনিষ্টর হেমন্ত সোরেন্নচিংবা য়াওনা মীয়াম্না মীখল তৌদুনা খল্লকখিবা মীয়ামগী মীহূৎশিংবু জেনরেল ইলেক্সন নকশীল্লক্লবা মতমসিদা বি জে পি অমসুং মসীগী মপাংশিংনা মীখলদা খুদোংচাবা লৌনবা পান্দমদা ইনভেষ্টিগেসন অমত্তা তৌরমদনা আই টি, ঈ দিনচিংবা এজেন্টশিং শীজিন্নদুনা ফাগৎলবা মতূংদা জেলদা নমশীন্দুনা থমজিল্লি হায়না মহাক্না অকনবা ৱাফম ফোঙদোকখি। আর্বিন্দ কেজ্রিৱাল, হেমন্ত সোরেন্নচিংবা মীয়ামগী লুচিংবশিং অসীনা লৈবাক অসীগী কন্সটিট্যুসন অমসুং দেমোক্রেসি কন্ননবা হোৎনরুবগীদমক বি জে পি লৈঙাক্না ফাগৎলবা মতূংদা জেলদা নমশীন্দুনা থম্লিবনি হায়না মহাক্না ফোঙদোকখি।
লৈবাক অসীদা হৌজিক মীয়াম্না মহৌশাগা মান্নদবা লৈঙাক সাসন অমগী মখাদা ফোঙদোকফম খঙদবা অঙকপা মতৌ অমা মায়োক্নরগা লৈরি। অমুক্তা থেংনরকখিদ্রিবা খাঙঙমদবা অৱাবা চৈনা-চৈথেং অমগা লোয়ননা পুন্সি লেল্লি হায়খি। মসিগী থাক অসিদি ‘কালয়ুগ কা অমরিট কাল’ অদুমক্নি হায়নসু মুফটিনা ফোঙদোকখি।ইন্দিয়া ব্লোকনা শীন্দুনা দিল্লীগী রামলিল্লা মাইদান্দা পাঙথোকখিবা লোকতন্ত্রা বচাও হায়বা মহারেল্লি অমদা ৱা ঙাঙবদা মহাক্না ৱাফম অসী ফোঙদোকখিবনি।
