বিহারগী ছাপ্রা এরিয়াদা বি জে পি-আর জে দিগী থৌমিশিং খূৎ থোক্নরকপদা অমা শিরে, অনী শোক্তুনা লায়কন্নখ্রে

হৌখিবা নিংথৌকাবা নুমিত্তা লৈবাক অসীগী ওইনা হৌজিক তাঙ্কক তরেৎলক থোক্না পাঙথোক্লিবা লোক সভাগী মীখল অসীগী মঙাশুবা তাঙ্কক্কি মীখল মপূংফানা পাঙথোকখিবা অদুদা বিহারগী সারন লোক সভা সিটকি মনূংচন্না লৈবা ছাপ্রা এরিয়াদা বি জে পি অমসুং আর জে দি পার্টি অনীগী থৌমীশিংগী মরক্তা খঙহৌদনা উংখৎনরক্তুনা টেন্সন য়াম্না ৱাংনা লৈরকখ্রবা মতূং মথং নুমিৎ, মে ২১ লৈবাকপোকপগী অয়ূক্তা টেন্সন হেনগৎনরকপদগী অকনবা মওংদা খূৎ থোক্নখ্রে।
থৌদোক অদুদা মীওই অমা নোংমৈনা পানবদগী লায়কন্নবা ঙমদনা মফম অদুমক্তদা লৈখিদ্রে অদুগা অতোপ্পা মীওই অনীসু শোকপদগী লায়কন্নখ্রে।
মীখল পাঙথোকখিবা নুমীৎ অদুদা মীরেপ ওইরিবা অমনা পোল্লিং ষ্টেসন অমগী মনাক্তা চঙশীল্লকখিবা থৌওংবু অতোপ্পা পোলিটিকেল পার্টিগী মীরেপকি থৌমীশিংনা থিংবদগী পোল্লিং ষ্টেসন অদুদা চঙহনখিদবা থৌওংবু শীংনরদুনা কেন্দিদেট অদুগী সপ্পোর্টরশিংনা থোমজীল্লকপদগী চাউনা উংখৎনরকখি হায়রি। মতৌ অসূম্না নুমিৎ অদু নাকল অনীগী মরক্তা টেন্সন য়াম্না ৱাংনা লৈরকখ্রবা মতূংদা ঙরাং অয়ুক অমুক হন্না খূৎ থোক্নরকপদা মীওই অমা নোংমৈনা পানবদগী লায়কন্নবা ঙমদনা মফম অদুমক্তদা লৈখিদবনি। অতোপ্পা মীওই অনীসু শোকপদগী লায়কন্নখ্রে হায়রি।
থৌদোক অদুগা মরী লৈননা পুলিসনা চেন্নবনি হায়বা মীওই অনীসু ফাগৎপা ঙমখ্রে হায়না সারানগী দিষ্ট্রিক্ট মেজীষ্ট্রেট অমন সামিরনা ফোঙদোকখি। পোল্লিং ষ্টেসন নম্বর ৩১৮-৩১৯ মনাক্তা থোকখিবা থৌদোক অদু হৌজিক মপূংফানা কন্ট্রোল তৌবা ঙমলে, সেক্যুরিটিগী অহেনবা টিমশিং চঙশীন্দুনা ঙাক- শেনবগী থবক পায়খৎলি হায়খি।