বেঙ্গলুরু সিভিক বোদিনা গেমিং জোন নিপান থিংজিনখ্রে

বেঙ্গলুরু সিটিদা মফম অদুগী সিভিক বোদিনা চত্থরকখিবা কমপ্রেহেন্সিব ইন্সপেক্সন অমগী মখা তারকপা খোঙথাং অমদা সিটি অদুদা লৈবা গেমিং জোন নিপান থিংজিনখ্রে। কর্নাটাকাগী কেপিটেল বেঙ্গলুরু গী সিভিক এদমিনিষ্ট্রেটিব  বোদি অমা ওইনা লৈরিবা ব্রুহাট বেঙ্গলুরু মহানগরা পেলাইক (বি বি এম পি) না গেমিং জোন নত্রগা সেন্টর নিপান অদু সেফটি অমসুং রিগুলেটরিশিং নীঙথিনা ঙাক্লমদবা অমসুং নিতি-নিয়ম নাইদনা থবক তৌরম্বা কয়ামরুম থেংনবদগী থিংজিনখিবনি হায়না এজেন্সিগী পাউ অমনা ফোঙদোরক্লি।

ফয়ার সেফটি পার্মিট পায়রমদবা, পুলিস ক্লিয়ারেন্স য়াওরমদবা, মথৌ তাবা ট্রেদ লাইসেন্সনচিংবা লৌরমদবা কয়ানা মরম ওইদুনা গেমিং জোন নিপান অদু থিংজিনখিবগী মরূ ওইবা মরমশিং ওইরি হায়না এজেন্সিগী পাউ অসীনা মখা তানা ফোঙদোকখি। হৌখিবা মে ২৫ দা গুজরাটকি রাইকোট লমদমদা লৈবা গেমিং জোন অমদা য়াম্না খুদোংথীবা অমসুং লাইবকথীবা মৈহৌ-লাংপোক্কি থৌদোক অমা থোকখ্রবা মতূংদগী বেঙ্গলুরুদসু সিভিক বোদি অসীনা মসীগী এরিয়া ওফ ওপরেসন নত্রগা জুরিসদিক্সন মনূংচন্না লৈবা গেমিং জোনশিংদা কূপ্না য়েংশিন্দুনা ইন্সপেক্সন চত্থবগী থৌওং অদু হেন্না কন্সীল্লকখিবনি হায়রি।

গুজরাটকি রাইকোট লমদমদা লৈবা গেমিং জোন দা থোকখিবা মৈহৌ-লাংপোক্কি থৌদোক অদুদা অঙাঙ য়াওনা মীওই ২৭ শিহনখিবনি। থিংজিনখ্রে হায়রিবা গেমিং জোনশিং অদুগী মনূংদা কোরামঙ্গল দা লৈবা হেক্স এন্টারটেইনমেন্ট, কেম্প ফোর্ট মোলগী হীন্দুষ্টান এইরোনোটিক্স লিমিটেদ (হাল) তাখিবা লম্বীদা লৈবা গেমিং জোন অমা, য়েসৱান্টপুর মেইন রোদতা লৈবা বৈস্নবি মোল য়াওরি।