লম্লাই কেন্দ্রদা কংগ্ৰেস পার্টী অমসুং জনটা দল য়ুনাইটেদকি মরুওইবা থৌপুবা ওইনা লৈরম্বা মীওই মরি ভার্তিয়া জনতা পার্তীগী ৱাখল্লোন অমসুং থবক-থৌরমশিংদা হেন্না থাজবা থমদুনা, মখোয়না হান্না য়াওরম্লিবা পার্টিশিং অদূ থাদোক্লম্লগা বি জে পিদা চঙলকখ্রে।
মশা-মশানা য়াওরিবা পার্টীশিংগী লুচিংবশিং অদূগী থৌওংশিং থাজরক্তবদগী বি জে পিদা চঙলকখ্রবশিং অদূ ঙরাং লম্লাই কেন্দ্রগী এম এল এ খোংবান্তাবম ইবোমচানা তরাম্না ওকখি। থৌরমদুদা এম এল এ ইবোমচানা হায়, বি জে পিগী থবক থৌরমশিংদা ঙাইহাক লৈতনা অয়েৎপা, খুরৌ থাংবা থোকহন্ননবা পান্দমদা য়ৈখায়-থিনগাইবগী থবক তৌরিবা পোলিটিকেল পার্টি অমা পনবা তারবদি কংগ্ৰেস পার্টী অসীনি।
মীয়াম্নদি বি জে পিনা খুনাইগী য়াইফা-থৌরাং পাক-সন্না পায়খৎলক্লি হায়বসি খঙনরি।বি জে পিগী থবক অমসুং আইদিওলোজিদা থাজবা থমদুনা চঙলক্লবা কংগ্ৰেস অমদি জে দি য়ুগী লুচিংবশিং অসী তরাম্না ওকচরি লোয়ননা থবক-থৌরমশিং মখোয়গা তাথোক-তাশীন তৌনদুনা মীয়ামগী নুঙাই-য়াইফবা পুরক্নবা হোৎনগনি হায়না ইবোমচানা ফোণদোকখি।
