অরুনাচল প্রদেস বিজেপি লেজিসলেচর পার্টিনা পেমা খন্দুবু মখোয়গী লুচিংবা ওইনা ঙরাং খনখিবগা লোয়ননা ঙসি পেমা খন্দুবু ষ্টেট অসীগী চিফ মিনিষ্টর ওইনা ৱাশক লৌরগনি। ষ্টেট অসীগী লেজিসলেটরশিংনা মহাকপু মখা তানা পূন্না শৌগৎপিরকপগীদমক খন্দুনা ঈকায়খুম্নবা অমসুং তৌবিমল খঙবা ঊৎলি হায়খি। অরুনাচল প্রদেসকি লেজিসলেচর পার্টিগী লীদর ওইনা মহাকপু খল্লকপদা হায়ফম খঙদনা অপেনবা পোকই অমসুং নুঙাইবগা লোয়ননা লেজিসলেটরশিংবু থাগৎলি হায়না সোসিয়েল মেদিয়া পোষ্ট এক্সতা পেমা খন্দুনা ফোঙদোকখি।
প্রাইম মিনিষ্টর নরেন্দ্র মোদি গী ভিক্সিৎ ভারত হায়বা ভিজন, লাক্কদৌরিবা কুমশিং ২০৪৭ ফাওবদা মঙফাওননবা হোৎনবদা অরুনাচল প্রদেসনা থৌদাং চাউনা য়াবা ঙম্ননবা হোৎনবদা মীয়াম্না পূন্না শরুক য়ামিন্নসি হায়না পেমা খন্দুনা ফোঙদোকখি । ষ্টেট অসীগী এম পি অনী, এম এল এ শিং অমসুং পার্টিগী ৱার্করশিংনা কন্না হোৎনবদগী বি জে পিগী লৈঙাক অমা ষ্টেট অদুদা থমদুনা ঙসী মহাক্না মখা তাবা টার্মগীদমক ৱাশক লৌবা ঙম্লগনি হায়নসু পেমা খন্দুনা ফোঙদোকখি।
ঙরাং বি জে পিগী লেজিসলেটরশিংগী মীফম পাঙথোক্তুনা পেমা খন্দুবু মখোয়গী লুচিংবা ওইনা খনখিবা থৌরমদুদা বি জে পিগী সেন্ট্রেল ওবজার্বরশিং ওইনা লৈরিবা বিহারগী এম পি রবি শঙ্কর প্রসাদ, পার্টিগী নেস্নেল জেনরেল সেক্রেটরি টরুন চুগ অমসুং অরুনাচল ৱেষ্ট লোক সভা সিট্টগী অমুক হন্না মীখলদা মায় পাক্লক্তুনা য়ুনিয়ন মিনিষ্টর ওইনা লৈরিবা কিরেন রিজিজুসু শরুক য়াখি।
