মনিপুরগী তোঙান তোঙানবা মফমশিংদা লৈরিবা রিলিফ কেম্প শিংদা চঙজফম লৌদুনা লৈরিবা ইন্টর্নেল্লি দিসপ্লেস পার্সন (আই দি পি) শিংনা অনা-অয়েক য়াওরকপা মতমদা অখন্নবা মীৎয়েং চঙদুনা লায়েঙবা ঙম্ননবা চিফ মিনিষ্টর নোংথোম্বম বিরেনগী মীৎয়েং অমসুং পাউতাক মখাদা ইম্ফালগী খূমন লম্পাক্তা অনৌবা রিলিফ কেম্প অমা বি জে পি মনিপুর প্রদেশকি স্পোক্সপার্সনসু ওইরিবা এম এল এ কে ঐচ ইবোমচানা লুচিংদুনা হাংদোকখ্রে।
এম এল এ না অনৌবা রিলিফ কেম্প অদু হাংদোকপদা ৱাফম কয়া থম্লদুনা হায়, খূমন লম্পাক্তা হৌখিবা চহী ২০২৩ গী মে ২১দগী চৎলিবা চহী ২০২৪ অসীগী মার্চ ১৫ ফাওবা থা তরা চূপ্না মীরোনবীশিংগীদমক অখন্নবা রিলিফ কেম্প অমা চল্লাইদুনা লাকখিবনি। মীরোনবীশিং দাক্তরনা লায়েংবা, চেক- অপ তৌবা, অঙাং উনবা, ইপান থাবা থৌরমশিং পাঙথোক্তুনা লাকখিবনি। মদুদা অচঙবা শেনফম খূদীংমক বি জে পিনা পুদুনা লাকখিবনি হায়খি।
ঙসী ফাওবদা অশোয়- অঙাম অমত্তা য়াওদনা অঙাঙ ১৬৮ পোকখ্রবনি। হৌজিক অমুক চিফ মিনিষ্টরগী অকনবা মীৎয়েং মখাদা অখন্নরবা রিলিফ কেম্প অসি হাংদোকপনি। থা অসীগী ১৬ তা রিলিফ কেম্পশিংগী অপূনবা কোর্দিনেটিং কম্মিটিগা চিফ মিনিষ্টরগা উনদুনা ৱারী শান্নখিবা মতমদুদা রিলিফ কেম্প তা লৈরিবশিং অনা-অয়েক য়াওরকপদা অখন্নবা মীৎয়েং চঙদুনা লায়েংনবগীদমক খূমন লম্পাক্তা অনৌবা রিলিফ কেম্প অমা হাংগনি হায়বগী থাজবা চিফ মিনিষ্টরনা পীখিবা অদুগী মতূং ইন্না থবক পায়খৎলক্লিবনি হায়নসু এম এল এ ইবোমচানা ফোঙদোকখি।
