চৎলিবা এপ্রিল থা অসিগী ১৯ অমসুং ২৬ তা মনিপুরদা পাঙথোক্কদবা লোক সভাগী মীখল অসীগীদমক য়ুনিয়ন হোম মিনিষ্টর অমিট শাহানা পূং অমা অনীখককি খোঙচত্তা ইম্ফালদা লাক্তুনা বি জে পিগী ভোৎ খোমলম্বা অদুদা বি জে পিনা চত্থরক্লিবা অরানবা অশোয়বা পুম্নমক কংগ্রেস পার্টিদা থঙজীল্লম্লগা চেনখ্রে। হৌজিক মনিপুরগী লৈরিবা পেন্দিং ইস্যু ময়াম অসিগী মতাংদনা ৱাফম অমত্তা ফোঙদোক্লমদ্রে হায়না মণিপুর প্রদেশ কংগ্রেস কম্মিটি (এম পি সি সি) গী ৱার্কিং প্রসসিদেন্ট টি ঐচ দেবব্রত্তনা ফোঙদোকখ্রে।
ইম্ফালগী কংগ্রেস ভাবন্দা পাঙথোকপা পাউমীশিংগা উনখিবা থৌরমদা মহাক্না হায়, য়ুনিয়ন হোম মিনিষ্টর অমিট শাহা অসি মমাঙগী কুমশীং ২০২৩ গী মে অহুমদা কুকি নার্কো জো টেরোরিষ্টশিংনা টেরর এত্তেক চত্থরকখিবা মতমদা নুমিৎ নীনী-হুম্নিখক লাক্লম্লবা মতুংদা মহাক মশামক থা অদুমক্তদা নুমিৎ ১৫ নিগী মনুংদা অমুক হল্লকখিগনি অদুগা ঈরাং অসী লাকশীন্নবা হোৎনগনি হায়রম্বা মতমদুদগী লোত্তুনা লৈখ্রবা মতূংদা হন্দক বি জে পিগী দমক মনিপুরগী মীয়ামদগী ভোৎকি ভিখ্যা নিবা লাকখিবনি।
মহাক্না মনিপুরগী হৌজিক লৈরিবা খ্বাইদগী মরুওইবা এন আর সি, সি এ এ, কুকি মিলিটেন্টশিংনা ঙাইহাক লৈতনা হীংশা তৌদুনা মীওই লীশিং কয়া মনিপুরদা অৱাবা নংলিবা অসিগী মতাংদদি করিগুম্বা অমত্তা ফোঙদোক্লমদ্রে অদুগা বি জে পিনা থমজিনখিবা ফ্রী মূভমেন্ট রিজিম ( এফ এম আর) লৌথোক্লে হায়দুনা মীয়ামদা অপঙবা শীরম্লগা, কংগ্রেসতা থঙজীল্লম্লগা কুইনা লৈথবা ঙমদবদগী দিল্লিদা খোঙলৈ থুনা চেনখ্রে হায়না দেবব্রত্তনা ফোঙদোকখি। মীয়াম্না কাউথোকখ্রবা, ঈরোন্নুংদা লৈখ্রবা নাগা-কুকি ক্লাশ, পাইটে-কুকিগী ৱাথোক, মৈতৈ অমসুং মৈতৈ পাঙলগী ক্লাশ ময়ামদু নৌহৌননা পুথোক্তুনা পঙঙাঙ ঙাঙলম্লবা মতূংদা মদূ পূম্নমক্তু কংগ্রেসননি অমুক হায়জীল্লম্লগা দিল্লীদা চেনখিবসি লাইবক থীবনি। মণিপুরদা হৌজিক থোক্লিবা হীংশাগী ঈরাং অসী লোইশিন্নবগী মতাং অমত্তা পল্লমদবসি খ্বাইদগী অঙকপা ফাওই হায়খি।
