ওল ইন্দিয়া পিস এন্দ সোলিদারিটি ওরগনাইজেসন( এপসো) গী জেনরেল কাউন্সিলগী মীফম অমা ন্যু দিল্লিদা লৈবা ঐচ কে এস ভবন্দা চৎলিবা থা অসীগী ১৬ তগী ১৮ ফাওবা পাঙথোকখ্রে। মীফম অদুদা দেলিগেট মেম্বর ওইনা মনিপুরদগী দা. পুয়াম খোগেন, খেত্রিময়ুম শান্ত, থিংবাইজম সোভা অমসুং বোবি জেমস ৱাহেংবম শরুক য়াখি। নুমিৎ হুম্নি চূপ্না চত্থখিবা মীফম অদুগী অহৌবা নুমীত্তা হন্দক্তা লাইবক থীবা চীং নীঙখায়বগী থৌদোক্তা ৱায়ানদ দিষ্ট্রিক্ট তা লৈখিদ্রবশিংগী মফমদা অৱাবা ফোঙদোকপগা লোয়ননা ঈকায়খুম্নবসু ঊৎখি। লৈখিদ্রবশিংগী মফমদা অৱাবা ফোঙদোকপগা লোয়ননা মিনিট অনী তূমিন্না লৈদুনা মখোয়গী আত্মা না মপূগী খূয়াদা ঈঙনা-চীক্না লৈরুনবা থৌনিজখি হায়রি।
মীফম অদুদা হৌজিক মনিপুরদা থোক্লিবা হীংশাগী ঈরাং অসীনা মীয়ামদা পীরক্লিবা চৈথেং, বংলাদেসতা থোক্লিবা, মাইনোরিটিশিংগী মথক্তা চত্থরিবা হীংশাগী থৌদোক, পেলেষ্টাইনগী ইস্যু, খা-নোংপোক এসিয়াদা ওইরক্লিবা রাজনিটি অমসুং ইকোনোমিগী মতাংশিং পুখত্তুনা খন্ন-নৈনখি হায়রি। হৌজিক মনিপুরদা থোক্লিবা হীংশাগী ঈরাং অসীনা মীয়ামদা পীরক্লিবা অকনবা চৈথেংশিং, মসীগী থাক অসীদগী মতৌ করম্না মনিপুরদা থবক পায়খত্তুনা মহৌশাগী ঈং-তপ্পা, নুংশিনবগী মরী অদু নৌহৌননা শাগৎকদগে হায়বগী মতাংদা এপসোগী নেস্নেল সেক্রেটরিসু ওইরিবা দা. পুয়াম খোগেন্না মীফম অদুদা মরীক চূম্বা ৱাফম কয়া ফোঙদোকখি হায়রি।
সেন্টর অমসুং ষ্টেট কী লুচিংবশিংনা কম্যুনিটি খূদিংমক্কি মীহূৎশিং কৌরগা সোল্যুসন পুরক্নবা ৱাফম হোদোক্ননবা প্রাইম মিনিষ্টর গী মফমদা তকশীন্ননবা ৱারেপসু মীফমদুদা লৌখি হায়রি।
