অকোয়বগী মফমশিংদা শেংদোক্তুনা লূ- নান্না থম্বতা নত্তনা ঈশা-ঈশাদা লৈরিবা পূক্নিংগী অমোৎপা, ফত্তবা ৱাখল্লোনসু শেংদোকপা মথৌ তাই: চিফ মিনিষ্টর

ঐখোয়না মতম চূপ্পদা লম-তু শেংদোক্তুনা লূ- নান্না লৈননবা, হকচাং নাদ-য়েক্তনবা হোৎনরিবা অসীগুম্না ঈশা- ঈশাদা লৈরিবা পূক্নিংগী অমোৎপা ফত্তবা পূম্নমক শেংদোক্তুনা অফবা ৱাখল অমসুং থবক তৌরবদি চাওখৎপা, অফবা খুন্নাই অমা শেমগৎপা ঙমগনি হায়না চিফ মিনিষ্টর নোংথোম্বম বিরেন্না ফোঙদোকখ্রে।

মিনিস্ট্রি ওফ হাওসিং এন্দ অর্বান এফিয়ার্স কি মীৎয়েং মখাদা স্বাস্ত হি সেবা-২০২৪ গী থৌরম হৌদোকখিবদা শরুক য়ারদুনা ৱাফম অসী চিফ মিনিষ্টরনা ফোঙদোকখিবনি। ঙরাংদগী হৌরগা লাক্লিবা ওক্তোবর থাগী তাং অনীফাওবা স্বাভাব স্বাচতা সন্সকার স্বাচতা হায়বা থিমদা চত্থগদবা লূ- নান্না অকোয়বগী মফমশিং থম্ননবা থাখায় অমা চূপ্না পাঙথোক্কদবা কেম্পেইন অদু ইন্দিয়া পূম্বগী ওইনসু ঙরাংদগী হৌদোকখি।

লৈবাক অসীগী মফমশিং শীন্থুংনা পাঙথোকপা থৌরম অসীগী মনূংচন্না সহর অমসুং খুঙ্গংগী মফমশিংদা লৈরিবা অমোৎ- অকায়শিং শেংদোকপা, মীয়ামদা লূ- নান্না লৈবগী মতাংদা ৱাখল তাহন্ননবা প্রোগ্রাম কয়া পাঙথোকপনা মরূ ওইবা শক্তম অমা ওইগনি হায়রি। নারক্ট্রিঙৈদা নাদনবা হোৎনবগী খোঙথাঙ অমা ওইনা হেল্থ স্ক্রিনিং প্রো গ্ৰামশিং পাঙথোকপা, মেদিকেল চেক- অপ তৌবনচিংবা থৌরম কয়াসু পাঙথোক্কনি হায়রি।

থৌরম অদুদা রাজ্য সভাগী এম পি নিংথৌ লৈসেম্বা সনাজাউবা, মিনিষ্টরশিং- দা. সাপম রঞ্জন, টি ঐচ বিশ্বজিৎ, কে গোবিন্দাস, এল সুশিন্দ্রো, টি ঐচ বসন্তকুমার, খাসিম ভাসুম অমসুং এম এল এ শিংসু শরুক য়াখি।