আসাম- অরুণাচল প্রদেশ বোর্দরদা অকনবা নোংলৈ- নুংশিৎকা লোয়ননা কা হেন্না কন্না হৈথরকখিবা নোংজুনা মরম ওইদুনা মীয়ামগী মহৌশাগী পুন্সিদা চাউনা চৈথেং পীখ্রে। ষ্টেট অনী অসীগী বোর্দরদা লৈরিবা ইষ্ট সিয়াং দিষ্ট্রিক্ট কি মনুংচন্না লৈরিবা রক্সিন সার্কলদা য়াম্না চাউনা অমাঙ- অতা থোকহনখ্রে। হৌখিবা থাঙজা নুমীৎকী অথেঙবদা অকনবা শাফূগা লোয়ননা য়ৌশিল্লকখিবা নোংলৈ- নুংশিৎ অদুনা য়াম্না অকনবা মওংদা নোং তাহনখিবগা লোয়ননা মতম শাংনা মীয়াম্না অয়াকপা নুমিৎকী মৈশা মায়োক্নরগা লাকখিবা অদুদগী ঈংথবা, নুঙাইবা ফংহনখ্রবসু নাকল অমরোমদদি কা হেন্না অৱাবা খুদোংচাদবা কয়া মায়োক্নহনখি হায়রি।
অবোর লেকু, মাংনাং, বারোমাইল, লিঙ্কা, মিকোং, সিলি অমসুং সিকা তোদি নচিংবা খুঙ্গংশিংদা উপাল-ৱাপালশিং পাক সন্না তুহনখিবগা লোয়ননা পোবা রিজার্ব ফোরেষ্ট মনাক্তা লৈরিবা নেস্নেল হায়ৱে ১৫ গী পরীংদা কিলোমিটর অনী হেন্না পাক চাউবা মফম খোন্দুনা অমাঙ- অতা কয়া থোকহনখি।
অকনবা নোংলৈ- নুংশিৎ অদুনা মরম ওইদুনা গারীশিং-ট্রক, টেঙ্কর, বসনচিংবা কয়ামরুম চৎথোক-চৎশীন তৌবা য়াহনখিদে। নোংলৈ- নুংশিৎ অদুনা মরম ওইদুনা ইলেক্ট্রিক পোলশিং থুদেকখিবদগী পৱার ফংনদবগী ফীভমশিং মীয়াম্না মায়োক্নরগা লৈরে হায়রি।
