মনিপুর লৈঙাক্কি মখাদা লৈরিবা এগ্ৰিকলচর দিপার্টমেন্ট অসী মপী-মপা পান্দ্রবা লোয়শঙ অমা ওইরক্লে। দিপার্টমেন্ট অসীদা সেন্টরনা স্কিম অনীগী মতাঙদা লৌমীশিংগী বেঙ্ক একাউন্ট শিংদা দাইরেক্ট বেনিফিট ট্রান্সফর তৌদুনা থাদোকখিননবা পীথরকখিবা লূপা ক্রোর ১২৯.৪৯ লোমগী য়াম্লবা শেনফমশিং দিপার্টমেন্ট অসীগী ওফিসিয়লশিংনা পূল্লপ ওইনা হৈনথোকখ্রে।মসীগী মতাঙদা চপ চাবা খূদম চাংদমশিং মতীক চানা মশামক্তা লৈরে হায়না ৱাংখেম কেন্দ্রগী কংগ্ৰেস এম এল এ কৈশাম মেঘচন্দ্রনা ফোঙদোকখ্রে।
ঙরাং ১২ শুবা মনিপুর লেজিসলেটিব এসেমব্লিগী তরেৎশুবা সেসনগী মঙানি চনবা নুমিত্তা দিমান্দ দিস্কসন অৱারদা কট মোসন পুখৎলদুনা, মেঘচন্দ্রনা ৱাফম অসী ফোঙদোকখিবনি। মহাক্না হায়, স্কিম অনীগী য়াম্লবা শেনফমশিং অদূ দিপার্টমেন্ট অসীগী স্কিম-ইন-চার্জ য়াওনা অতৈ ওফিসিয়েলশিং অমদি মখোয়গী ঈমূঙ-মনূঙগী মীওই কয়ামরূম য়াওনা শাশিন্নবা বেঙ্ক একাউন্ট কয়ামরুম, মশক খঙদবা লৌমী বেনিফিসরিশিংগী মিংদা হাংদোক্লগা হৈনথোক্লম্বা থেংনরকপনি। প্রধান মন্ত্রী ক্রিষি শঞ্চার য়োজনা অমসুং পি এম কিষান স্কিম অনী অসীগী শেনফমশিং তুম্না হাইদত্তুনা মাঙহনখিবদা, শেঞ্জা-থুমজা অমত্তা য়াদবনি হায়না লৈরিবা বিজেপি লৈঙাক্না য়েংদুনা লৈরোইদবনি।
অকনবা চৈরাক পীননবা অখন্নবা এনক্বারি অমা অথূবা মতমগী মনূঙদা চত্থবিয়ু হায়না মেঘচন্দ্রনা মরী লৈনবা মিনিষ্টরগী পূক্নিং চিংশিনখি। মহাক্কি ৱাফমশিং অদূ মুন্না তারবা মতূঙদা, ৱাথোক অসীদা চেন্নবা মরাল লৈবা ওফিসিয়লশিং অকনবা চৈরাক পীনবা দিপার্টমেন্টেল এনক্বারি অমা চত্থরগনি হায়বা ৱাফম চিফ মিনিষ্টর য়ূম্নাম খেমচান্দনা হাওসতা থমখি।
