মতম কয়াগী মমাঙদগী ঙসিফাওবা লৈঙাক্না শেমজীনবিদনা লৈরকপদগী কা হেন্না ফীভম শোকচিল্লক্লবা লম্ফেল কোর্ট লম্বী হায়রগা খঙনরিবা, ইম্ফাল নোংচুপ পানাগী লম্ফেলদা লৈরিবা লম্বী অসী ওল মনিপুর বার এসোসিয়েসন ( অম্বা) না লৈঙাক অসীগী মফমদা শেমজীনবিনবা কয়ারক মমাঙদা তকশীনখ্রবসু থৌশাদনা লৈখিবদগী পেন্নদ্রবা এদভোকেটশিং থোক্লক্তুনা মতম কক্তনা লম্বী অসী থিংজিনখ্রে।
এদভোকেটশিংশু কোর্ট কা মরী লৈনবা থবক-থৌরম পূম্নমক ঙরাংদগী হৌরগা মতম কক্তনা লেপ্লগনি হায়না ফোঙদোকখ্রে। অম্বাগী প্রসিদেন্ট পূয়াম তোমচানা পাউমীশিংদা ফোঙদোরকখিবগী মতূং ইন্না, কা হেন্না ফীভম শোকচিল্লক্লবা লম্বী অসীদা পূখ্রীমুক চাউনা মফম কয়াদা কোমজাউশিং লৈরবসু লম্বীগী ময়ায়, মতাই হায়বা খাক্তনা ঈশীং থূমজীন্দুনা লৈখিবা মরম্না কোমজাউশিং অদু উদবদগী লম্বী অসীদা খোঙনা অমসুং গারি থৌদুনা চৎপা মীওই কয়ামরুম এক্সিদেন্ট থোকপদগী অশোক- অপন য়াওনখ্রে। থা অসীগী ২৩ দসু অম্বাগী মেম্বর ওইরিবা এদভোকেট অমা লম্বী অসীদা এক্সিদেন্ট থোকপদগী য়াম্না থীনা শোক্তুনা লায়কন্নখি হায়বা ৱাফম তোমচানা মখা তানা ফোঙদোরকখি।
এদভোকেটশিংনা চঙশিল্লিবা লম্বী থিংবগী প্রোটেষ্ট অসী লৈঙাক্না লম্বী অসী মপূঙফানা শেমজীন্দ্রিবফাওবা চত্থখিগনি। ঙসিদগীদি লম্ফেল কোর্টকি জজ খূদিংমকসু প্রোটেষ্ট অসিদা য়াওশীল্লগনি হায়খি।
