মনিপুর ষ্টেট লিগেল সার্বিসেস অথোরিটি (মাসলসা) না শীন্দুনা চৎলিবা থা অসীগী ২১ দা লিগেল এৱেরনেস প্রোগ্রাম অমা পাঙথোকখিবগা লোয়ননা হন্দক সুপ্রিম কোর্ট কি জজ ওইনা এপ্পোইন্ট তৌরকখ্রবা ইহান হানবা মনিপুরি অমসু ওইরবা জষ্টিস এন কোটিশ্বরগা উনদুনা ইন্টরেক্সন প্রোগ্রাম অমসু পাঙথোকখ্রে।
থৌরম অদুদা জষ্টিস এন কোটিশ্বর, মহাক্কি লোয়নবী প্রোফেসার ভিজয়ালক্সমি ব্রারা, মনিপুর হায় কোর্টকি জজ ওইনা লৈরিবা জষ্টিস এ বিমোল, হায় কোর্ট অসীগী জজ এ গুনেশ্বর শর্মা, জষ্টিস গোলমৈ গাইফুলশিল্লু কবুই অমসুং মনিপুর জুদিসিয়েল একাদেমিগী দিরেক্তর ওইনা থৌ পুরিবা জষ্টিস কে ঐচ নোবিন সিংহসু শরুক য়াখি।
জষ্টিস এন কোটিশ্বর অসী মনিপুরদগী ইহান হান্না সুপ্রিম কোর্ট কি জজ অমা ওইনা এপ্পোইন্ট তৌরক্লবা মীওই অমা ওইরকপদা য়াম্না নুঙাইবা ফাওই অমসুং মনিপুরি অমা ওইনা চাউথোকচবা পোকই হায়না জষ্টিস এ বিমোলনা থৌরম অদুগী তরাম্না ওকপগী ৱারোল পীবদা ফোঙদোকখি। গাউহাটি হায় কোর্ট ইম্ফাল বেঞ্চ হায়না লৈরম্বদগী মনিপুর ষ্টেট খক্কি ওইনা মপূঙফাবা হায় কোর্ট অমা ওইনা লৈরকখিবা মতমদুদগী জষ্টিস এন কোটিশ্বর না মীয়ামদা লিগেল এৱেরনেস মপূঙফানা ফংহন্ননবা অমসুং জষ্টিস ফংহন্ননবা লেপ্পা লৈতনা হোৎনদুনা লাকখি হায়না থাগৎপা ফোঙদোকখি।
