অৱাবা কোঙ্গায় মায়োক্নরবসু ঈমা লৈবাক্কিদমক থেংনবদি লেপ্পা য়াদে: সি এম

মনিপুর লৈঙাক্না শীন্দুনা ঙরাং ষ্টেটকি থাক্তা অথৌবশিং নীঙশিংবগী থৌরম পাঙথোকখ্রে। থৌরম অদুদা ষ্টেট অসীগী গভর্নর, চিফ মিনিষ্টর, মিনিষ্টরশিং, এম এল এ শিং, ষ্টেট লৈঙাক অসীগী সিভিল অমসুং পুলিশ কি মকোকথোংবা ওফিসিয়েল কয়াসু শরুক য়াখি।
ইম্ফালগী মোইরাংখোমদা লৈরিবা যুবরাজ টিকেন্দ্রজিৎকি নীঙশীং খুভম লৈরিবা হীচম-য়াইচম পাত্তা চিফ মিনিষ্টরনা লুচিংদুনা মীয়াম্না অয়ূক অঙনবদা হৈকৎ-লৈকৎ তমখি। মখাতানা পেলেস কম্পাউন্দা লৈরিবা ঈপূ থাঙ্গাল জেনরেলগী মিটমদসু মীয়াম্না হৈকৎ-লৈকৎ তমদুনা ঈকায়খুম্নবা ঊৎখি। কংলা উত্রা মমাঙদসু মুয়াম্না লৈ-শূ কৎনখি। মদূগী তুংদা বির টিকেন্দ্রজিট পার্ক হায়রগা খঙনরিবা ফৈদাপূংদা মপূং ওইবা থৌরম পাঙথোকখি। মফম অদুদা লৈরিবা সহিদ মিনারদা মীয়াম্না হৈকৎ-লৈকৎ তমখি।
মনিপুরদা থোক্লিবা হীংশাগী ঈরাং অসী তুংকোইনা চৎনগদবা ৱারোয়শিন অমা পুরক্ননবা হোৎনবা মথৌ তাই। শান্টি পাম্লবদি য়েক্নবশিংগা পূন্না থবক তৌমিন্নগদবনি হায়বা নেলসন মন্দেলাগী ৱাফম অদু ঙসী ঐখোয়না নীংশীংবা চুমগনি হায়না চিফ মিনিষ্টরনা ফোঙদোকখি।
মৈতৈনা মেজোরিটি কম্যুনিটি অমা ওইরুবনা খুদোংচাদবা কয়াগী চৈথেঙ খাঙবা মথৌ তাই। লাইওইখ্রবা ঐখোয়গী থৌনা ফরবা ঈপা-ঈপূশিংনসু ঈরমদম অসীগীদমক অৱাবা কোঙ্গায় মায়োক্নরবসু ঈমা লৈবাক্কিদমক থেংনবদা চোকথবা লৈখিদে, থৱায়না পোন্থা পীদুনা ঈরমদম অসী ঙাক্লকখিবনি হায়না চিফ মিনিষ্টরনা ফোঙদোকখি।