শগোলমাঙ পুলিস ষ্টেসনগী মনূংচন্না লৈরিবা মৈখাং আই আর বি পোষ্টতা থা অসীগী অনীগী অঙনবা অয়ূক পূং মরিরোম তারকপদা অফবা মখলগী খূৎলায় অমসুং বোম্নচিংবা শীজিন্নদুনা কুকি- চিন মিলিটেন্ট শিংনা লান্দারক্তুনা পোষ্ট অদুগী বঙ্কর অহুম মৈ থারম্বগা লোয়ননা বঙ্কর অদুদা থম্বা এল এম জি য়াওনা নোংমৈ অহুম মুনখ্রে। মিলিটেন্ট শিং অদুনা দ্রোন বোম্বিং য়াওনা অকনবা মওংদা লান্দারক্তুনা পোষ্ট অদূ লায়না খূদুম চনখিবনি হায়রি। মোর্টার সেল কয়ামরুমসু কাপশীল্লকখিবা কুকি- মিলিটেন্টশিং অদুনা মফম অদুদা কূমথরক্তুনা পোষ্ট অদুদগী খূৎলায়শিং মুনখিবগী মথক্তা বঙ্কর অহুম মৈ থাদোক্লমখিবনি।
মফম অদূগী মায়োক্নবদা লৈরিবা মাক হীলদগী চঙশীল্লক্তুনা অকনবা মওংদা লান্দারক্তুনা এত্তেক চত্থরকখিবা অদুদা বঙ্করদা লৈখিবা মশীং য়ামদবা আই আর বি পার্সনেলশিং অদুনা মায়োক্নবা ঙমদবদগী মনাক নকপা মোংশোংশিংদা চঙশীন্দূনা পোজিসন লৌরগা লৈখি। কুকি- মিলিটেন্ট শিং অদুনা বঙ্কর অদূ খূদূম চন্দুনা এ কে রাইফল অমা, ইন্সাস রাইফল অমা অমসুং লাইট মেচিন গন ( এল এম জি)অমসু পুদুনা চৎখি হায়রি।
আই আর বি পোষ্ট অদুদা কুকি- মিলিটেন্টশিংনা লান্দারক্তুনা এত্তেক চত্থরকখিবা অদুদা মনাক নক্না লৈরিবা শগোলমাঙগী এ আর কেম্পনা খঙশীন- উশিন্নদনা লৈখিবা থৌওংবু য়ানিংদবা ফোঙদোক্তুনা মশীং য়াম্লবা মায়কৈ অদোমগী ঈমা মৈরা পায়বীশিং থোমজিন্দুনা এ আরগী কেম্প অদুদা প্রোটেষ্ট তৌখিবনি হায়রি। কুকি- মিলিটেন্টশিংনা ফোরেনগী দ্রোন শীজিন্নরক্তুনা বোম কাপশীল্লকখিবা অদু কাপথবা ঙম্বা, মতীকচাবা খূৎলায় লৈতবনা হৌজিকমক্কি ওইনদি অরুবা ফীভম অমা মায়োক্নরগা লৈরি হায়না এ আরগী মকোকথোংবা ওফিসারশিংনা ফোঙদোরকখি হায়রি।
