ইন্দিয়াগী তরানিপালশুবা লোক সভাগী মীখল অসিদা ঙরাং অহুমশুবা তাঙ্কক্কি ওইনা ইলেক্তোরেটশিংনা মশীং য়াম্বা চাংদা থোক্নরক্তুনা মশাগী অপাম্বা মীরেপশিংদা য়াম্না শান্তি ওইনা ভোৎ থাধনখ্রে।ষ্টেট অমসুং য়ুনিয়ন টেরিটোরি তরামাথোইগী তোঙান তোঙানবা লোক সভা কন্সটিট্যুয়েন্সি ৯৩ দা হন্দক্কি তাঙ্কক অসিদা ভোৎ থাধনখ্রে। নুংদাং পুং ৮ তাবফাওবদা ফংবা রিপোর্ট মতূং ইন্না, পূন্না য়েংবদা হন্দক্কি তাঙ্কক অসিদা ভোটরশিংনা থোক্নরক্তুনা ভোৎ থাদবগী চাং চাদা ৬১.৪৫ য়ৌখি।
ঈশিং নুংশিৎকি ফীভম কা-হেন্না ফত্তবগা লোয়ননা কা হেন্না শাবা নুমীৎকি হীট-ৱেব মায়োকনরবসু মীয়াম্না মশা মশাগী য়ূমদগী থোক্নরক্তুনা ভোৎ থাদনবগী চাং অদুম্মক ৱাংনা লৈখি। আসামদা ভোৎ থাদবগী চাং চাদা ৮২ ফাওবা য়ৌদুনা লৈবাক অসিগী ওইনা খ্বাইদগী হেন্না লৈখি। মীয়াম্না পোল্লিং বুটশিংগী মমাঙদা পরেং য়াম্না শাংনা ক্যূদা লেপ্তুনা মশা মশাগী টর্ন ঙাইদুনা লৈনখি।
মমাঙদা অমুক্তা ওইখিদ্রিবা মওংদা, অহুমশুবা তাঙ্কক্কি মীখল অদুবু য়েংনবগীদমক তোঙান তোঙানবা মালেমগী লৈবাক ২৩ দগী দেলিগেট ৭৫ লাকখিবগা লোয়ননা থৱায় য়াওনা মীৎয়েং তাখি। মখোয়না পোল্লিং বুথ কয়াদা কোয়না চত্তুনা মীখলগী থবক থৌরমশিং অদু অঙকপগা লোয়ননা য়েংখি। পোল্লিং পার্সনেলশিংনা মশীং য়াম্লবা ভোটরশিং অমসুং মীয়ামবু পেলহন্ননবা মওং মরীল তানা মথঙ-মনাও নাইনা থবক তৌবা উবদা ফোরেন দেলিগেৎশিং অদু মশাদা অঙকপগা লোয়ননা মীৎয়েং তাখি।
