হন্দক হৌখিবা এপ্রিল ১৯দগী হৌখিবা, তাঙ্কক তরেৎ থোক্না পাঙথোকখিবা ১৮ শুবা লোক সভা মীখল অদুগী ফল চৎলিবা জূন থা অসীগী মরিদা লাউথোকপা লোইখিবদা ইন্দিয়া অপূনবগী ওইনা নূপী কেন্দিদেট ৭৩ মায় পাক্লক্তুনা এম পি মিংথোল ফংলে। কুমশিং ২০১৯ দা পাঙথোকখিবা লোক সভা মীখল অদুগী ফল মতূং ইন্না নূপী কেন্দিদেট ৭৮ মায় পাক্তুনা ভারতনা নীংতম্বা ফংদুনা মীয়ামগী মীখল কুমশিং ১৯৫১ দগী পাঙথোকপা হৌরকখিবা মতম অদুদগী ঙসীফাওবদা নূপী মীরেপ খ্বাইদগী মশীং য়াম্না লৈখিবা লোক সভা অমা ওইখিবগী পুৱারি শেমখিবনি। হন্দক্কি অসীনা ইন্দিয়ান পারলিয়ামেন্টতা খ্বাইদগী হেন্না নূপী কেন্দিদেট মশীং য়াম্না মীখলদা মায় পাক্লকপা অনীসুবা তারি।
ৱেষ্ট বেঙ্গলদা নূপী মীরেপ খ্বাইদগী মশীং য়াম্বা ওইনা পূন্না ১১ মায় পাক্লক্তুনা এম পি ওইনা লৈখ্রে। হন্দক্কি লোক সভা মীখল অসীদা ইন্দিয়া পূম্বগী ওইনা পূন্না নূপী কেন্দিদেট ৭৯৭ না নোমিনেসন ফাইল তৌখিবনি। বি জে পিনা নূপী কেন্দিদেট ৬০ অদুগা কংগ্রেস পার্টিগী ওইনা নূপী মীরেপ ৪১ থাদোক্তুনা মীখল অসীদা মখোয় মখোয়গী লম্বাশিংগা থেংনহনখিবনি। ৱিমেন্স রিজর্বেসন বিল পারলিয়ামেন্টতা পাস তৌখ্রবা মতূংদা অহানবা পাঙথোকপা জেনরেল ঈলেক্সন অমসু হন্দক্কি লোক সভা মীখল অসিনা ওইরিবনি।
মমাঙ চহী ২০২৩ গী সেপ্তেম্বর ২১ দা বিল অসী পারলিয়ামেন্টনা পাস তৌখ্রবসু মপূংফানা চৎনহনবদি ঙসীফাওবদা ঙমদ্রিবনি হন্দক পাঙথোক্কদবা অহানবা সেন্সসতা য়ূম্ফম ওইরগা চত্থগদৌরিবা দিলিমিটেসন অদুগী মতূংদা বিল অসী মপূংফানা চৎনহন্ননবা থৌরাং তৌরিবনি।
