লৈবাক অসীগী হীন্দুশিংদা তাথী-তাওইবা ৱাঙাঙ ফোঙদোকপা রাহুল গান্ধী চপ চানা ৱারকপা ফরবনি:ভারত সেট্টি

হন্দক ইকুই কুইদ্রিঙৈ, লোক সভা সেসন মনূংগী নুমিৎ অমদা কংগ্রেস লুচিংবা অমা ওইবতা নত্তনা লোক সভাদা ওপ্পোজিসনগী লুচিংবা অমসু ওইরিবা রাহুল গান্ধী না লৈবাক অসিদা লৈরিবা হীন্দুশিংদা তাথী- তাওইবা ৱাঙাঙ কয়ামরুম ফোঙদোক্তুনা হীন্দুশিংদা ঈকায়বা পীখিবা অদুগীদমক মহাকপু অকনবা মওংদা ৱারক- ৱাতেম তৌদুনা খূৎ থাবা য়ারবনি, মদুনা মহাক্কি ওইনদি মতীক চাবনি হায়না কর্নাটাকা এসেমব্লিগী লেজিসলেটর অমা ওইরিবা ভারত সেট্টি না অকনবা মওংদা ৱাফম ফোঙদোরকখ্রে।
রাহুল গান্ধী গী এন্টি-হীন্দূ ওইবা রিমার্ক অদুদা হীন্দূশিংনা তূমিন্না খাঙজিন্দুনা, তারগা লৈথোকফম থোক্তে হায়না এম এল এ অসীনা অকনবা মওংদা ৱাফম ফোঙদোরকখ্রে। হৌখিবা নিংথৌকাবা নুমিত্তা গান্ধীগী ৱাফম অদুগী মায়োক্তা মঙ্গালুরুদা চৎখিবা মীয়ামগী প্রোটেষ্ট মার্চ অমদা মহাক্না ৱা ঙাঙবদা ৱাফম অসী ফোঙদোকখিবনি।
মাঙ্গালোর নোরথ এসেমব্লি কন্সটিট্যুয়েন্সিদগী কারকপা এম এল এ অসীনা মীয়াম তিনখিবা থৌরমদুদা হায়, রাহুল গান্ধী অসী এন্টি-হীন্দূ ওইবা পোলিসি অমা চৎলি। মীয়াম্না মহাক্কি ষ্টেটমেন্ট অদুদা খরা হেন্না কূপথনা য়েংশিনবা তারবদি রাহুল অসী য়াম্না হেঞ্জিন্না ঙাওরবা অঙাওবা অমনি হায়বদু খঙবা ঙমগনি হায়খি।
গান্ধী না লোক সভাদা মহাক্কি চয়েৎননিঙাই ওইরিবা ষ্টেটমেন্ট অদূ ফোঙদোকখিবা মতমদুদা মশামক্না মরম ঈরৈ লৈতবদা ভগবান সিব গী ফোটো অমসু পুথোরকখিবদু য়াম্না লানবা অমসুং তৌহৈদবা থৌওং অমনি হায়না এম এল এ অসীনা অকনবা ৱাফম কয়ামরুম ফোঙদোকখি।