লাক্লিবা নুমিৎ মরি-মঙানিগী মতমসিদা দিল্লি, য়ূপি নচিংবা মফমশিং হীটৱেবকি খুদোংচাদবশিং মায়োক্নরগা লৈখিগনি : আই এম দি

হৌজিকসু মখা তানা কা হেন্না নুমীৎকি অশাবা মৈশা মায়োক্নদুনা লৈরিবা দিল্লি, উত্তর প্রদেস, পঞ্জাব, চান্দিগরনচিংবা মফমশিংদা লাক্কদৌরিবা নুমিৎ মরি-মঙানিগী মতমদসু অকনবা হীটৱেবকি খুদোংচাদবশিং মায়োক্নরগা লৈখিগনি হায়না ইন্দিয়া মেটিওরোলোজিকেল দিপার্টমেন্ট ( আই এম দি) না নৌহৌননা ফোঙদোরক্লি। অশাবা হীটৱেবকি খুদোংচাদবশিং দগী খরা হেন্না কা হেঞ্জিনবা সিভিয়র হীটৱেবকি খুদোংচাদবশিং মায়োক্নরগা লৈখিগনি হায়না ৱেদর দিপার্টমেন্ট অসীনা মখাতানা ফোঙদোরক্লি।
লৈবাক অসীগী অৱাংথংবা শরূকশিংদা অকনবা হীটৱেবকি ফীভমশিং মায়োক্নগদৌরিবগী চৈরকশিদা অৱাং নোংপোক্তা লৈরিবা ষ্টেটশিং অমসুং ৱেষ্ট বেঙ্গলদনা খ্বায়দগী অকনবা মওংদা নোং হৈথরকপসু য়াই হায়রি। সব-হীমালায়ান ৱেষ্ট বেঙ্গোল, সিক্কিম অমসুং নোরথ ইষ্ট ইন্ডিয়াগী মফমশিংদা লাক্লিবা নুমিৎ মরী মঙানি অসীগী মনূংদা অকনবা মওংদা নোং তারক্কনি হায়না দিপার্টমেন্ট অসীনা ফোরকাষ্ট তৌরক্লি।
হৌখিবা চয়োল অসিদা দিল্লি অমসুং মশীগা লোন্নরিবা মফমশিংদা লৈখিবা টেমপরেচরগী চাং অদু হৌজিক ফাওবা হন্থরকপগী মওং লৈতবা মরম্না লাক্লিবা নুমিৎ মরী মঙানিসীগী মতমদসু ফীভম অসী মখা তাথনা লৈখিগনি হায়না ৱেদর দিপার্ট মেন্ট অসীনা ফোরকাষ্ট তৌরক্লি। দিল্লি গী তোঙান তোঙানবা মফমশিংদা হৌজিক সেলসিয়স দিগ্ৰি ৪৫ দগী ৪৭ ফাওবদা লৈদুনা কা হেন্না অশাবা মায়োক্নরগা লৈরি।