য়ূমথঙনরিবা ম্যানমারদা তঙদূ লৈতাদবা রাজনিতিগী ঈরাং লৈবা অমসুং মনিপুরগী কুকি অমসুং মৈতৈ কাঙলুপ শিংগী মরক্তা খূৎলায় পায়বা মীওই মশীং য়ামনা লৈনবনা হৌজিক থোক্লিবা হীঙশাগী ঈরাং অসি লাকশীনবদা য়ামনা খুদোংচাদবা অমা ওইরি হায়না ইষ্টর্ন আরমমীগী কমমানদর লেফটেনেন্ট জেনরেল আর পি কালিতা না ফোঙদোকখ্রে।
মশী মহাক্না নোংচুপ বঙ্গালগী ফোর্দ উইলীয়ম দা পাঙথোকখিবা পাউমিশিংগা উনখিবা থৌরম অমদা ফোঙদোকখিবনি। হৌজিক মনিপুরগী হীঙশাগী ঈরাং অসী লাকশীনবদা কা হেন্না খুদোংচাদবা ময়াম অমা সেক্যুরিতি পারসনেলশিংদা মায়োক্নরকলি। মীটৈ অমসুং কুকি ফূরুপ অনীমক্কি মায়কৈদা খূৎলায় মরাঙ কায়না পায়বা মরম না মতম অমদা হেক্তা খূৎলায় থাঙ্গৎনরকতুনা খূৎ থোক্নরকপা য়ারিবনি। মসি অকিবা ফাওই। অসীগুমবা কয়া অসি হন্দক মনিপুর পুলিসকি আর্মররিদগী খূৎশু খূৎলায় ময়াম মুন্দুনা পুখিবা অমসুং ম্যানমারদগী সোফিষ্টিকেটেদ ওইরবা খূৎলায় কয়ামরূম কুকি লালহৌবশিংনা পুশিল্লকপশিনা শীঙনবা কয়া অসী ওঈহল্লকখীবনি হায়খি।
লান্মীগী মথৌদি ঈরাং লাকশীনদুনা লো এন্দ ওর্দর ঙাকপা অমসুং খুননাইদা ঈং-তপ্পা শক্তম অমা থম্বা হায়বসিনি। মণিপুরদা সেন্ট্রেল সেক্যুরিতি ফোর্সন তৌফম থোকপা অমসুং লৌখৎফম থোকপা হীঙশা লাকশীনবগী থবক থৌরম খূদীঙমক লৌখৎলি। মনিপুর পুলিসকি আর্মররিদগী খোমগৎখিবা খূৎলাযশিং অমুক হন্না লৌখৎপগী তঙাইফদবা লৈরি। হৌখিবা থা মঙা তরুক অসিদা আর্ম ফোর্সন মরী লৈনবশিংগা খূৎশমনদুনা লানগী মওংদা পৈশিনদুনা থমলমবা খূৎলায় কয়ামরূম ফাগৎপা লৈখ্রে হায়না ফোঙদোকখি।
ম্যানমারদা মিলিটরি যুনটা অমসুং রাইভেল ফোর্সক অকনবা মওংদা খূৎ থোক্নবনা মরম ওইরগা ইনদিয়ারোমদা ম্যানমারিষ্ট কয়ামরূম চেনশীল্লক্লি। ম্যানমারদা ঈরাং নেমথরবা মতমদা মখোয়দু দিপোর্ট তৌননবা অকনবা থৌরাং পায়খৎপা তাবনি, মদু নত্ত্রবদি মতুং তারকপদা হেন্না ঈরাং থোকপা য়ারিবনি হায়নসু মহাক্না ফোঙদোকখি। মনিপুর পুলিসনা অসাম রাইফলসকি মতেংগা লোয়ননা ম্যানমারিষ্ট ময়ামশি বাইওমেট্রিক কেপচরগী থবক কন্না চঠথরি। ঙমখৈ দা আর্মিনা মীতোপ থিংবগী অকনবা থবক থৌরমশিং পায়খৎপা হৌরে হায়নসু মহাক্না মখা তানা ফোঙদোকখি।
