চিফ মিনিষ্টর এন বিরেন্না বেনিফিসরি লাখ মরিদা কান্নবা পীগদবা ক্রোর চহুমগী ৱেলফিয়র স্কিম ৪৬ লোঞ্চ তৌখ্রে

ঙরাং ইম্ফাল ইষ্ট দিষ্ট্রিক্টকি পেলেস কম্পাউন্দ মচীন্দা লৈরিবা সিটি কনভেন্সন সেন্টরদা মনিপুরগী চিফ মিনিষ্টর এন বিরেন্না লমদম অসিগী মীয়ামদা চাউনা কান্নবা পীরগদবা তোঙান তোঙানবা ৱেলফিয়র স্কিম ৪৬ লোঞ্চ তৌখ্রে।
বেনিফিসরি লাখ মরীদা কান্নবা পীগদৌরিবা স্কিমশিং অদু হৌখিবা থা মঙারোমগী মমাঙদা লোঞ্চ তৌননবা হোৎনরম্বনি অদুবু ষ্টেট অসীদা মাঙজৌননা তম্বা ঙমদবা মহৌশাগী থৌদোক অমা ওইনা তমথিরবা ঈশীং ঈচাওগী থৌদোক হঞ্জিন-হঞ্জিন্না থোক্লক্তুনা মনিপুরগী মীয়ামদা চাউনা চৈথেং পীরকখিবা মরম্না মতম চানা লোঞ্চ তৌবা ঙমখিদবনি হায়না চিফ মিনিষ্টর এন বিরেন্না ফোঙদোকখি। লূপা ক্রোর অহুমলোমগী স্কিমশিং অদু লোঞ্চ তৌবতা নত্তনা চিফ মিনিষ্টর না ভেটরিনারি মোবাইল এম্বুলেন্স ভেহিকল ৩৩ সু লমথাদুনা লোঞ্চ তৌখি।
লমদম অসীগী তোঙান তোঙানবা রিলিফ কেম্প শিংদা লৈরিবা ইনমেটশিংনা শাজবা মখল মখা কয়াগী পোৎলমশিং থেন্দুনা থম্লিবশিংদসু সি এমনা কোয়না চত্তুনা য়েংশিনখি। মনিপুর লৈঙাক্কি কেবিনেট মিনিষ্টর শিং, এম এল এ শিং, পুলিস অমসুং সিভিলগী মকোকথোংবা ওফিসিয়েলশিংশু শরুক য়াখিবা থৌরমদুদা সি এম্না হায়, এন আর সি চৎনহনবা পাম্লিবা বি জে পি দা মীয়াম্না ভোৎ পীবিবগী মহুত্তা মসীবু চৎনহনবা পামদবা পোলিটিকেল পার্টিদা ওইনা ভোৎ পীখিবসী লাইবক থীবনি। অদূম ওইনমক হৌজিকসু মীয়ামগী অপাম্বা অনীংবা পূম্নমক্তু মহাক্কি ষ্টেট লৈঙাক্না থবক ওইনা পাঙথোক্ননবা শেম-শাদুনা লৈরি হায়খি।