গিরিস চোদানকরনা ক্বাক্তা রিলিফ কেম্পতা চত্তুনা লৈখিদ্রবা প্রেমকুমারগী ঈমূংগী মীওইশিংগা উনখ্রে

মনিপুরদা মমাঙ চহীগী মে অহূমদগী ঙসীফাওবা লেপ্পা লৈতনা চত্থরক্তুনা লাক্লিবা হীংশাগী ঈরাং অসীনা মরম ওইদুনা চুরাচান্দপুরদগী লাঞ্জেন্নরগা ক্বাক্তাগী রিলিফ কেম্পতা চঙজফম লৌদুনা লৈরকখ্রবা মতূংদা নহান থৌরী য়ান্দুনা লৈখিদ্রবা অঙোম প্রেমকুমারগী ঈমূংগী মীওইশিংগা উনদুনা এ আই সি সিগী মনিপুর ইন-চার্জ ওইরিবা গিরিস চোদানকরনা অৱাবা ফোঙদোকখ্রে। মহাক্না এম পি সি সি গী ৱার্কিং প্রসিদেন্ট ভিক্তর কৈশিং অমসুং পার্টি অসীগী অতৈ লুচিংবা কয়াগা লোয়ননা মফমদুদা চত্তুনা ঈমূং-মনূংগী মীওইশিংদা অঙম্বা শেলগী মতেংসু পাংখি।
চিন- কুকি মিলিটেন্ট শিংনা নোংমৈ কাপ্লক্তুনা অমসুং য়ূমশিং তুম্না মৈ থাদোকখিদুনা তান্থোরকখিবা মতমদুদগী লাঞ্জেন্নরগা লাকখিবা মতমদুদগী ঙসীফাওবা অঙোম প্রেমকুমারগী ঈমূংগী মীওইশিং য়াওনা ঈমূং কয়ামরুম ক্বাক্তা এরিয়াদা হাংবা রিলিফ কেম্পতা চঙজফম লৌদুনা লৈরকখিবনি। প্রেমকুমার অসী চৎলিবা জুলাই থা অসীগী তরেত্তা খঙহৌদনা মথন্তা থৌরী য়াঞ্জরগা শিদুনা লৈরম্বনি হায়রি।

মহাক অৱাবা কয়া রিলিফ কেম্পতা মায়োক্নরগা লৈরিবা ফীভম অদুনা মরম ওইদুনা মচাশিংবু নীংথীজনা য়েংশিনবিবা ঙমদৌবা লৈত্রে, হৌজিক লৈরিবা মওং অসীদা হিংলুবগী কান্নবা করিসু লৈতে হায়না মহাক্কি লোয়নবিদা তত্তনা ফোঙদোক্লম্মি হায়না মহাক্কি লোয়নবিনা ফোঙদোকপসু লৈখ্রবনি।
মনিপুর লৈঙাক্কি মায়কৈদগী রিলিফ কেম্পতা লৈরিবা মীয়ামগী অৱাবা পেন্দবশিং কোকহন্ননবা খূদক্তা অকনবা থবক পায়খৎফম থোকই হায়না চোদানকরনা ফোঙদোকখি।