ঐচ আই ভি/এইদসকি ৱারল্ড মেপতা য়াওরম্বা মনিপুর ঙসীদি অয়াম্বা লাকশীনবা ঙম্লে: চিফ মিনিষ্টর

মনিপুর অসী ঙসীদগী চহী খরগী মমাঙদদি ঐচ আই ভি অমসুং এইদসকি ৱারল্ড মেপতা য়াওরম্বা ষ্টেট অমনি অদুবু বি জে পিনা লুচিংবা লৈঙাক অমা অহানবা ওইনা কুমশীং ২০১৭ তগী লাকখ্রবা মতূংদগী ৱার এগেন্স দ্রগ কেম্পেইনগী অকনবা খোঙজং চত্থরকখিবদগী শীংথানিঙায় ওইনা ফীভমদুদগী লাকশীনবা ঙম্লে হায়না চিফ মিনিষ্টর নোংথোম্বম বিরেন্না ফোঙদোকখ্রে।
ঙরাং মনিপুর পুলিসনসু মালেমগী অতৈ মফমশিংদা পাঙথোক্নবগুম ইন্টর্নেস্নেল দে এগেন্স দ্রগ এব্যুজ এন্দ ইল্লিসিট ট্রাফিক্কিংগী থৌরম পাঙথোক্তুনা নিষা অমসুং দ্রগতগী ঐখোয় খূদীংমক লাপ্না লৈদুনা চাওখৎপা, ঈং-তপ্পা, মতীং লৈবা মনিপুর অমা শেমগৎলসী হায়বগী পাউজেল পুবা বাইক রেলি অমা চিফ মিনিষ্টর সেক্রেটরিয়েট মমাঙদগী সি এমনা লমথাখিবা থৌরমদা মহাক্না ৱাফম অসী ফোঙদোকখিবনি।
মনিপুর লৈঙাকনা ৱার ওন দ্রগস কেম্পেইন, ফাইট এগেন্স ক্রোসবোর্দর ইল্লিগেল ট্রাফিক্কিংনচিংবগী খোঙথাঙ পায়খৎলকপদগী লমদম অসীগী চীংগী দিষ্ট্রিক্ট শিংদা মতম অমদা পাক-সন্না লম হেক্তর কয়ামরুমদা থারম্বা পোপ্পি পাম্বীশিং মাঙহনবা ঙম্লে। পোপ্পি থারম্বা লমগী অপূনবা শরুক্কি চাদা য়াঙ্খৈদগী হুম্ফু ফাওবগী চাংদা হন্থহনবা ঙম্লে হায়না থমখি।
মখা তানা পোপ্পি পাম্বীশিং য়ান্থত্তুনা মাঙহনখিগনি। মপূংফানা মাঙহন্দ্রিবফাওবা খোঙজং হল্লোই, হীরম অসীগী মতাংদা করিগুম্বা অমত্তগা কমপ্রোমাইজ তৌরোই হায়না চিফ মিনিষ্টরনা ফোঙদোকখি।