অকনবা সমুদ্রগী নোংলৈ -নুংশিৎ অমা ওইরিবা সাইক্লোন রেমালগী অকনবা চৈথেং আইজোলদা মায়োক্ন খিবগা লোয়ননা ষ্টেট অদুগী মফম কয়াদা ঈশীং ঈচাও থোক্তুনা থোং কয়ামরুম চেন্থদুনা অকনবা ঈশীংগী ঈচেলনা পুখিবা অমসুং তোঙান তোঙানবা মফমশিংদা চীঙ নীঙখায়বগী থৌদোকশিং মায়োকনরকপদগী মীয়ামগী মহৌশাগী পুন্সিদা চাউনা অকায়বা থোকহনখ্রে।
ঙরাং মিজোরামগী কেপিটেল সিটি ওইরিবা আইজোলদগী খরা চৎলগা লৈরিবা মালথুম অমসুং লিমেন এরিয়া অনীগী লংদাইদা লৈবা চীংশাং নাপোম অমদা অকনবা নুংশিৎকা লোয়নরকখিবা অতৎ- অখম লৈখিদবা নোংজুনা মরম ওইদুনা চীঙ নীংখায়রকপদা মীওই তরামঙা শিখ্রে, অদুগা অতোপ্পা মীওই কয়াসু থিবা খঙদনা লৈরি হায়না ফোঙদোরক্লি।
মফম অদুদা লৈবা ষ্টোন ক্বারি অমদা থবক শূদুনা লৈবা শিন্মি তরামঙা চীঙ নীঙখায়বগী লৈখোমগা লোয়নরকপা চীঙলৈচাকশিং অদুনা ফুমজিনখিবগী অকিবা ফংলবা অৱাবা থৌদোক অমদা লৈখিদবনি হায়রি। রেসক্যু ৱার্করশিং অমসুং মফম অদুগী খুঞ্জাশিংনা মী কনবগী অকনবা থবক পায়খৎখিবগা লোয়ননা লৈনূংদা, লৈচাকশিংনা ফুমজিনখ্রবা মীওইশিং লৌথোক্ননবা হোৎনরি।
হৌজিক লৈচাকশিংনা ফুমজিনখ্রবা মীওইশিং অদু হিংনা ফংখিগনি হায়বগী থাজবা লৈত্রে অদুমক ওইজরবসু ফংনবা থবক্তি মখাতানা চত্থখিগনি হায়রি।
নেসনেল হায়ৱে-৬,হুন্থার লমদমদসু লেন্দস্লাইদ থোকপদগী আইজোলগা লৈবাক্কি অতৈ মফমশিংগা ফাওনবা য়াদনা লৈখ্রে, স্কুলশিংসু ছুটি থাদোকখ্রে।