এ এন এস): পেলেস্তিনিয়ান তেরোরিস্ত গ্রুপ হমাসকী লিদর য়াহয়া সিনৱৱগী নুমিৎ মশীং কক্লে, মহাক্কী মখুত্তা অমেরিকানশিং গী ঈ তৈরি হায়না য়ুনাইতেদ স্তেত্সকী সেনিয়র ওফিসিএল অমনা ফোঙদোকখে।
য়ুনাইতেদ স্তেত্সকী নেসনেল
সেক্যুরিতি এদভাইজর (এন এস এ) জেক সুল্লিবানগী ইজ রেল খোঙচৎ মনুংদা মমীং মথা তাকথোক্তবা সেনিয়র ওফিসিএল অদুনা পাউমীশিংদা ৱা ঙাংবদা ৱাফমসি ফোঙদোকখিবনি। ইজরেলগী লিদরশিংনা সিনৱৱগী মায়োক্তা অসিগুম্বা থ্রেত কয়া তৌদুনা লাক্লি, অদুবু য়ু এসকী সেনিয়র ওফিসিএল অমনা হকথেংননা হায়বা অসিদি হন্দক্কী অসিনা অহানবনি। “ফনা মতম চঙলবসু অচুম্বা ব্রায়েনদি চখগনি হায়বসি হায়বদা কায়দে হায়না খল্লি” হায়না সেনিয়র এদমিনিস্ত্রেসন ওফিসিএল অদুনা হায়খি।
পনবা য়াবদি হৌখিবা ওক্তোবর ৭ তা হমাস অমসুং অতৈ মিলিতেন্ত গ্রুপশিংনা ইজরেলদা য়াম্না চাউনা লান্দাবা মতমদা অমেরিকা মচা য়ামদ্রবদা ৩৮ শিখি অমসুং হৌজিক হৌজিক গাজাদা ফাজিল্লগা থল্লিবা লানফাশিংগী মরক্তা য়ু এসকী সিতিজেন ওইবা অমসুং পর্মনেন্ত রেসিদেন্ত ৮ সু য়াওরি।
মমাঙদা জেক সুল্লিবান্না ইজ রেলগী প্রাইম মিনিস্তর বেঞ্জামিন নেতনয়াহু অমসুং মহাক্কী ব্রার কেবিনেতকা উনদুনা লানগী মতাঙদা ৱা খন্নখি। হমাসকী মায়োক্তা লান শোক্লবদা য়ু এসনা সঙ্গোর্ড পীবিবগীদমক নেতনয়াহুনা এন এস এগী মফমদা থাগৎপা ফোঙদোকখি।
লান মায় পাঞ্জিবা ফাওবা অমসুং অপুনবগী পান্দম ফংদ্রিবা ফাওবা লান মখা চখনবা প্রাইম মিনিস্তর অমসুং সুল্লিবান্না ৱা তান্নখি। মখোয়না হমাসকী মিলিতেন্তশিং হাত্তোকপা, লানফা পুম্নমক থাদোকহন্নবা, হমাসকী মিলিতরি মপাঙ্গল লৌথোকপা অমসুং গাজাদা হমাসকী শাসন লোইশিন্নবগী মতাঙদসু ব্রারী শানখি হায়না প্রাইম মিনিস্তর্স ওফিস (পি এম ও) না থাদোক খিবা ৱারোল অমদা হায়খি। গাজাদা লৈরিবা মীচমশিংদা তেঙবাং পোৎলম য়ৌহন্নবা অমসুং ইজরেলগী অৱাং লোমদা ইরানগী প্রোক্সি হেজবোল্লা মিলিতেন্ত গ্রুপ থেংনবগী মতাঙদসু ৱা খন্নখি। দিফেন্স মিনিস্তর যোব গল্লন্ত, ব্রার কেবিনেত মিনিস্তর বেন্নি গঞ্জ, ইজরেল দিফেন্স ফোর্সেস (আই দি এফ) কী চীফ হর্জি হালেভি য়াওনা তোপ ওফিসিএল কয়ানসু এন এস এ সুল্লিবানগা ব্রারী শানখি হায়রি।
